Vazhdimet vendosin, Norvegjia në finale!

Pas Francës, finalistja e dytë e Kampionatit Botëror të hendbollit është Norvegjia.

Përfaqësuesja skandinave dhuroi një paraqitje fenomenale ndaj përfaqësueses kroate, paraqitje e cila në fund u kurorëzua me fitore, që nënkupton kalim në finale për norvegjezët.

Mund të thuhet që takimi i luajtur sonte mes Kroacisë dhe Norvegjisë ishte më interesanti nga të gjitha takimet e tjera që u luajtën deri më tani. Këtë konstatim e mbështet bindshëm edhe fakti që për t’u përcaktuar fituesi, skuadrat u detyruan të shkojnë në ‘extra time’, me kohën e rregullt që përfundoi me rezultat të barabartë 22-22.

Përveç hendbollistit Myrhol që shënoi 6 gola, heroi i vërtetë dhe shpëtimtari i Norvegjisë në këtë takim ishte portieri Bergerud, i cili edhe sonte i mundësoi skuadrës së tij kualifikimin në fazën tjetër pas disa pritjeve vendimtare që i realizoi.

Në finale, Norvegjinë e pret punë e vështirë ndaj Francës favorite, kurse Kroacia luan ndaj Sllovenisë për medaljen e bronztë.

Finalja luhet më 29 janar, ndërsa ndeshja për vendin e tretë luhet nesër (28 janar).