Akili dhe Laura ngjiten lartë në ranglistën botërore të xhudos

Federata Ndërkombëtare e Xhudos (IJF) ka përditësuar ranglistën botërore të xhudistëve dhe xhudisteve pas përfundimit të Kampionatit Evropian që u mbajt në fundjavën që e lëmë pas në Lisbonë të Portugalisë, ku Kosova u bë shteti më i suksesshëm duke i fituar 2 medalje të arta dhe 1 të bronztë.

Duke u bazuar në rezultatet e Evropianit, ngritje në ranglistë kanë bërë Akil Gjakova dhe Laura Fazliu.

Akili me medaljen e artë në kategorinë deri në 73 kg te meshkujt, u ngjit për një shkallë më lartë duke u renditur nga pozita e tetë në të shtatën.

Ndërsa Laura e cila përfundoi e pesta në kategorinë deri në 63 kg te konkurrenca e femrave, u ngjit për 8 pozita më lartë, për t’u renditur tani në pozitën e 42-të.

Distria Krasniqi që gjendet në pozitën e parë në kategorinë -48 kg dhe Nora Gjakova në pozitën e katërt në kategorinë -57 kg, i ruajtën pozitat e tyre edhe më tej.

Pozita e pandërruar i mbeti edhe Majlinda Kelmendit ( e pesta) në kategorinë deri 52 kg, e cila nuk garoi fare në këtë Evropian.

Ndërkaq rënie për një pozitë pati Loriana Kuka (-78 kg) që tani renditet në pozitën e tetë, si dhe Flaka Loxha (-57) me rënie për tri pozita për t’u renditur tani në pozitën e 78-të.