Edhe një herë Patriotët!

Ajo çfarë ndodhi të dielën është e pashpjegueshme! E vetmja gjë që do të mund të nxirrnim nga SuperBowl LI është se – futbolli amerikan, NFL në fakt, është diçka e mrekullueshme!

Arsyeja kryesore pse Patriotët fituan për mendimin tim qëndron tek ndrojtja, nënshtrimi që të tjerët kanë kundrejt Bill Bellichik. Tom Brady s’do të ishte asgjë më shumë se një kuarterbek mesatar po të mos ishin të gjitha të bëmat e Bellichikut. Një pjesë e unazave që kanë fituar të dy, ngjashëm sikur kjo e fundit, vijnë falë dështimeve të kundërshtarëve. Pa harruar edhe gjërat jomorale e jolegale që kanë bërë.

Nuk mund të mos themi që Fajkonjtë nuk dështuan të mbronin rezultatin. Ishin aq në qejf, aq lart sa që nuk brengoseshin për vrasjen e kohës duke depërtuar. Provonin pasime, dhe në çerekun e katërt asnjëra nuk funksionin. Edhe Jones ishte i mbuluar mirë, derisa Ryan nuk ishte i përgatitur psiqikisht për të mbrojtur një epërsi të tillë. Mbrojtja që shkarkonte Bradyn së paku një herë në çdo posedim topi ishte e vdekur.

Atë çfarë bëri Brady ishte madhështore. Gjithë ata numra në pjesën e dytë janë për t’u marrë mësysh, por s’mund të përjashtojmë edhe ndikimin e mbrojtjes së Fajkonjve në këtë fitore. Tashti, paramendoni po të ishte Gronkowski çfarë rezultati do të kishim!

Dhe menjëherë pas kësaj fitoreve, shfaqen fjalën se a është Brady lojtari më i mirë i të gjitha kohërave. Janë fjalë që matin unazat dhe shifrat deri diku duke përjashtuar të gjithë faktorët tjerë kontribuues – në krye Bellichik. Gjithashtu përjashtohen edhe të gjitha të zezat që kanë bërë të dy së bashku! Prandaj, sado që e mrekullueshme të jetë fitorja e të dielës, puna e ‘më të mirit’ është një diapazon më i gjerë që medoemos kërkon të merren parasysh edhe shumë faktorë tjerë.

Gjithçka nga pak do të ketë në tregun e agjentëve të lirë këtë pranverë. Ndryshime në organikën e disa skuadrave veç kanë ndodhur. Do të jetë një verë e gjatë, por jo me ndryshime të mëdha. Favoritët mbeten të njëjtën edhe për vitin e ardhshëm. Patriotët janë ekipi për tu ndaluar. E Fajkonjtë nëse arrijnë të kthehen më mirë se që kanë bërë Seahawks e Panterat, do të ishte mrekulli. Kjo humbje do të ju shfaqet në makthet më të trishtueshme për shumë kohë.