Synohej fitorja, Kosova “kënaqet” me barazim

Në përballjen e parë si vendas në kuadër të kualifikimeve për Botëror, Kosova ka barazuar ndaj Belgjikës, duke humbur rastin e mirë për fitoren e parë në grup, pas humbjes nga Turqia në përballjen e parë të grupit.

Kosova pas pjesës së parë që e kreu në avantazh 14-12 në pjesë të dytë nuk i ka bërë ballë për pak belgëve, për tu ndarë me barazim në fund 28-28.

Pjesën e parë Kosova e nisi keq, duke qenë në disavantazh 0-2, por u rikthye edhe arriti epërsinë më të madhe në ndeshje, duke e bërë rezultatin 10-7, për të mbyllur 30-minutëshin e parë të ndeshjes 14-12.

Në pjesë të dytë Belgjika nisi më mirë. Mori epërsinë me tre gola rresht dhe ndeshja vazhdoi me plotë ndërrime rezultati, derisa Kosova në 5-minutëshin e fundit riktheu epërsinë me 26-25. Në secilin gol të shënuar të Kosovës belgët barazuan dhe dy minuta para fundit të ndeshjes kur rezultati u bë 28-28 goli nuk erdhi dhe ekipet fituan pikët e para në grup.

Drenit Tahirukaj shënoi 6 gola për Kosovën, duke qenë më efikasi në ndeshje, ndërsa nga katër herë në portën kundërshtare shënuan Deniz Terziqi dhe Egzon Gjuka.

Te belgët më të dalluarit ishin: Quinten Colman me 6 gola dhe dyshja Yves Van Cosen e Sebastien Danesi, me nga katër të shënuara.

Në përballjen tjetër të grupit, Turqia mposhti Greqinë si mysafire, për të thelluar lidershipin në grup.

Pas dy xhirove të para, renditja aktuale në grup është:

TABELA AKTUALE:

1. Turqia 4p.
2. Greqia 2p.
3. Belgjika 1p.
4. Kosova 1p.

Duelet tjera të grupit, luhen në janar 2022.