RAUNDI PRELIMINAR - FUTSALL "EURO2018"
Ekipi i Kosovës
Kosova-Danimarka nesër, kualifikimi shumë afër
1 February, 2017 @9:37
Përfaqësuesja e Kosovës në futsall është shumë afër të sigurojë kualifikimin për në fazën kryesore të kualifikimeve për EURO 2018 në futsall.
Pas fitoreve në dy ndeshjet e para të Grupit E ndaj Norvegjisë dhe Qipros, nesër të kaltërit ndeshen me Danimarkën në duelin e fundit dhe përcaktues të Grupit E.
Kosova ka pikë maksimale në këtë grup, ndërsa edhe barazimi do t’i konvenonte për të shkuar tutje.
Nga grupi preliminar i EURO2018 në futsall, kualifikohet fituesi i grupit.
Fituesi i grupit i bashkohet 21 skuadrave tjera të renditura në listën e shteteve më të forta të futsallit në Europë, të cilët brenda datave 3 dhe 12 prill 2017 do të përcaktojnë pjesëmarrësit në turneun final që mbahet në janarin e vitit të ardhshëm në Slloveni.
Këta të fundit janë të kualifikuarit e vetëm direkt, si organizator të turneut.
