Dardan Berisha gati për ndeshjen ndaj Bashkimit

Ylli i basketbollit kosovar, Dardan Berisha, është gati! Pas kalimit në Pejë dhe zyrtarizimit nga KB Peja si lojtar i ri i ekipit, Berisha ka nisur stërvitjet me ekipin.

E sot, KB Peja ka bërë të ditur se shuteri është gati për të qenë pjesë e ekipit për ndeshje ndaj Bashkimit. Përndryshe, këta të fundit janë pa humbje ende këtë stinor, pasi që kanë regjistruar startin më të mirë në histori të klubit.

Dardan Berisha më 15 nëntor mbush të 36-tat, por basketbollisti 191 centimetra i gjatë me përvojën e tij dhe me saktësinë e tij pritet t’i jep cilësi dhe siguri lojës së verdhezinjëve.

“Fokusi në maksimum, përgatitjet e fundit para ndeshjes ndaj Bashkimit.
Dardan Berisha rikthehet nesër të luaj në “Karagaçi” me fanellën verdhezi të KB Peja”. — shkroi KB Peja sot në njoftim.

Peja që nisi stinorin me trajnerin Rami Hadar, i cili ishte aty edhe në dy vitet e kaluara, ka ndarë rrugët me izraelitin ndërsa tashmë ka emëruar Daniel Nelsonin trajner, me të cilin ende nuk ka arritur të shijojë fitoren në Superligë.

Peja - Bashkimi, luhet këtë fundjavë, të shtunën me fillim prej orës 19:00 në “Karagaç”. Aktualisht bilanci i Pejës në Superligë është 2-4, ndërsa i Bashkimi 6-0!