Vëllaznimi ndërpren bashkëpunimin me Branimir Pavicin

Skuadra e Vëllaznimit pas rezultateve jo të pritura në gjashtë ndeshjet e para të stinorit të ri të Superligës, ka ndarë rrugët me trajnerin kroat të ekipit, Branimir Pavic.

Njoftimin e ka bërë të ditur llogaria zyrtare e klubit kuqezi në Facebook, ndërsa ka falenderuar Pavicin për bashkëpunimin e deritashëm. Gjithashtu, Vëllaznimi ka bërë të ditur se janë vënë në kërkim për trajner të ri të ekipit për vazhdim të stinorit.

“Me marrëveshje të dyanshme kemi ndërprerë bashkëpunimin me trajnerin Branimir Paviq, të cilin e falenderojmë për kontributin në skuadër dhe i dëshirojmë suksese në vazhdimin e karrierës.
Drejtuesit e klubit janë duke punuar për të gjetur trajnerin e ri të ekipit sa më shpejtë të jetë e mundur dhe për të vazhduar punën e rikthyer ekipin në rrugën e fitoreve.” - ka bërë të ditur njoftimi i KB Vëllaznimi.

Përndryshe, Vëllaznimi aktualisht ka bilanc 2-4 në Superligë dhe është në pjesën e poshtme të renditjes tabelare. Këtë fundjavë, Vëllaznimi është mysafir i Prishtinës. Ndërkohë pas kësaj xhiroje që do të luhet në fundjavë, përfundon edhe cikli i parë i ndeshjeve të stinorit. 

Përndryshe, Pavic bëhet trajneri i tretë i larguar nga detyra në Superligë pas gjashtë xhirosh! Rami Hadar i Pejës ishte i pari, më pas u largua edhe Casey Owens i Yllit, ndërsa kroati u bë i treti!