Arrin finalen e tetë

I pesti në renditjen botërore të tenisit, Rafael Nadal, ishte fatal për kundërshtarin në setin e parë duke thyer dy ‘game’ të kundërshtarit dhe duke e fituar setin e parë për fiks gjysmë ore. 

Tomas Berdych e bëri setin e dytë më garues duke luftuar deri në fund të saj, por spanjolli Nadal kaloi në një nivel tjetër të lojës për t’ia marrë edhe setin e dytë rivalit të tij në gjysmëfinale. 

Me këtë fitore, Nadal ka arritur finalen e tetë me radhë prej se është kthyer nga lëndimi në muajin shkurt. Berdych, i cili arriti në gjysmëfinale pas mposhtjes së serbit Novak Djokovic ishte mjaft i entuziazmuar, por nuk arriti ta ndalë Nadalin në top formë. 

Që nga muaji shkurt, Nadal ka fituar titujt e Sao Paulos, Acapulcos, Indian Wells-it, Barcelonës dhe Madrid-it, derisa është mposhtur në finalet e Vina del Mar dhe Monte Carlos. Ai në finale do të ndeshet me fituesin e duelit tjetër gjysmëfinal, Roger Federer - Benoit Paire. 

ROMA MASTERS - GJYSMËFINALJA