Brazilianet për fund

Martine Grael dhe Kahena Kunze fituan garën vendimtare në disiplinën e re olimpike në velim 49er. Falë përfundimit para dyshes nga Zelanda e Re, Alex Maloney e Molly Meech, brazilianet siguruan të artën në disiplinën e fundit në sportin e lundrimit me vela në këtë olimpiadë. E bronzta u takoi danezeve Jena Mai Hansen dhe Katja Salskov-Iversen.

Në kategori të ngjashme tek meshkujt, dyshja nga Zelanda e Re ishte më e suksesshme se tek femrat. Peter Burling e Blair Tuke morën të artën duke vulosur dominimin e tyre me fitore në garën e fundit, përkundër titulli të siguruar më parë. Ata kishin marr të argjendtën në Londër, medalje që në Rio i takoi Nathan Outteridge e Iain Jensen nga Australia. Erik Heil e Thomas Phossel nga Gjermania morën të bronztën.

Mathew Belcher nuk arriti të përsëriti suksesin e Londrës në 470 tek meshkujt. Ai kësaj radhe me William Ryan përfundoi vetëm i dyti, para grekëve Panagiotis Mantis dhe Pavlos Kagialis. E arta u takoi kroatëve Sime Fantela e Igor Marenic.

Tek femrat në këtë disiplinë më të mirat ishin Hannah Mills e Saskia Clark nga Britania e Madhe. Ato siguruan titullin duke lënë mbrapa kampionet e Londrës, Jo Aleh e Olivia Powrie. Në Londër Mills e Clark kishin përfunduar në pozitën e dytë. Dyshja franceze Camille Lecointre e Helene Defrance mori të bronztën.

Në sportin e lundrimit me vela, shtetet më të suksesshme ishin Australia e Zelanda e Re të cilat morën nga katër medalje, prej të cilave vetëm një të artë. Me nga dy medalje të arta këtë olimpiadë e përfunduan Britania e Madhe dhe Holanda.