Gezer: Nuk kalkulojmë, fokusohemi te vetja

Pas tre humbjeve radhazi në 13 qershori, Golden Eagle Ylli i është kthyer fitores si vendas, ndërsa trajneri turk i ekipit Fatih Emre Gezer ka thënë se ekipi i tij ka kontrolluar ndeshjen për të arritur te fitorja.

“Së pari uroj Prishtinën për lojën e treguar. Ne kemi pasur një pjesë të parë të shkëlqyeshme, ndërsa më pas osciluam, por loja ishte në kontrollin tonë. Kjo është me rëndësi. Në fakt, të gjitha ndeshjet ndaj Prishtinës janë shumë të përafërta,” ka thënë Gezer për mikrfoninin e kanalit transmetues të ndeshjes.

Golden Eagle Ylli ka siguruar PlayOffin, ndërsa deri në fund të stinorit të rregullt kanë mbetur vetëm edhe 3 xhiro.

“Tash besoj që po e arrijmë formën tonë më të mirë. Ne nuk po kalkulojmë fare për pozita në renditjen tabelare. Ne jemi duke u fokusuar në formën tonë, kjo është me rëndësi për ekipin,” ka shtuar ai.

Golden Eagle Ylli është në pozitë të dytë të renditjes tabelare dhe ka bilanc 16-9 pas 25 xhirosh. Nëse përfundon stinorin në dy pozitat e para, suharekasit do të sigurojnë direkt gjysmëfinalen e PlayOffit, ndërsa nëse përfundojnë nën pozitën e dytë, atëherë do të duhet të luajnë edhe përballjet çerekfinale të PlayOffit.