TEUTA - PRIZRENI'16

Davis 49 pikë, Prizreni’16 fiton dramën ndaj Teutës

17 March, 2022 @21:21

Basketbollisti amerikan i Prizrenit’16 Darrell Davis ka shënuar 49 pikë në 45 minuta të lojës, për ta ndihmuar ekipin e tij në fitore të rëndësishme në kuadër të Ligës Unike ndaj Teutës, 103-110 [23-19, 15-25, 16-24, 40-26, 9-16].

Një ndeshje që në çerekun e tretë dha sinjale se Prizreni’16 i Arbnor Rifatit do të shkonte lehtë drejt fitores në 10-minutëshin e fundit të lojës së rregullt.

Mirëpo, ekipi i Melzin Lazimit ka treguar një saktësi mahnitëse dhe me 40 pikë të shënuara në çerekun e katërt të lojës karshi 26 të pranuarave kanë barazuar ndeshjen për ta çuar atë në vazhdime.

E aty Prizreni’16 kaloi pak më lehtë, duke pasur parasysh që 5 lojtarë të Teutës i bënë nga 5 gabime personale (të pestit të huaj) dhe fitoi ndeshjen.

Sa i përket performancave të lojtarëve, Davis pos 49 pikëve bëri edhe 10 kërcime, 4 topa të rrëmbyer, 4 asistime dhe një bllokadë në këtë lojë, që ia garantoi Prizrenit’16 vendin e tretë në Ligë Unike në fund të stinorit të rregullt.

Te ekipi durrësak, që ka në skuadër shtatë të huaj, Nasir Core luajti me 33 pikë e 7 asistime, duke qenë më i miri te Teuta. Kurse me 16 pikë tjera u dallua Frenki Lilaj, që bëri edhe 6 kërcime në ndeshje.

Me fitore, Prizreni’16 ruan pozitën e tretë në Ligën Unike një xhiro para fundit të saj dhe tash ka bilanc 8-5, ndërsa Teuta 6-7.