Denys Lukashov - përforcim i ri i Pejës

Reprezentuesi i Ukrainës në basketboll, Denys Lukashov, është përforcimi i parë i Pejës, pas njoftimit të ekipit që ndau rrugët me dy të huaj. Lojtari i pozitave një dhe dy, organizator dhe shuter, me gjatësi prej 188 centimetrave dhe në moshë 35 vjeçare, pritet të sjellë përvojën e tij te verdhezinjtë.

Lukashov së fundi (në stinorin 2023/24) ka qenë pjesë e ekipit ukrainas Prometey, ndërsa ka pasur mesatare prej 4.2 pikësh, 2.9 asistimesh e 2.4 kërcimesh për ndeshje. Ai kryesisht ka qenë pjesë e ekipeve ukrinase përgjatë karrierës së tij, ndërsa hap të mirë kishte bërë kur luajti për Nancyn në kategorinë e dytë të Francës në stinorin 2021/22.

“Reprezantuesi Ukrainas është basketbollist i pozitave 1/2 dhe ka ndërtuar karrierë në Francë, Lituani, Rusi, Ukrainë - duke marrë pjesë edhe në kompeticionin prestigjioz Europian, Eurocup - ku ishte pjesë e fazës çerekfinale.
Poashtu, Lukashov ka qenë edhe pjesë e Kombëtares së Ukrainës për mbi një dekadë, duke luajtur në ndeshje të mëdha kundër gjigantëve Europian të Basketbollit.
Lukashov me përvojën e tij të madhe, vjen i motivuar për të qenë ndryshim pozitiv te KB Peja për sezonin 2024/25.” — bëri të ditur KB Peja në njoftim.