E-sports me shpërblim më të madh se Wimbledoni

Kupa Botërore e lojës Fortnite ka shpërblim më të madh sesa Wimbledoni. Garuesit në këtë e-sport do të kenë mundësinë të fitojnë shumë të madhe parash, ndërsa gara më e madhe në botë do të mbahet në New York të SHBA-ve.

95 garues do të marrin pjesë në Fortnite për të fituar shpërblimin e kampionit, që merr 3 milionë dollarë! Shpërblimi më i vogël i kësaj gare është 50 mijë dollarë. I katërti në garë merr 1 milionë dollarë shpërblim!

Fituesit e Wimbledonit 2019, Novak Djokovic dhe Simona Halep, morrën nga 2.92 milionë dollarë për triumfin e tyre.

Me mbi 250 milionë lojtarë, Fortnite: Battle Royale është bërë njëra ndër video-lojërat më të popullarizuara prej se doli në vitin 2017.

Pjesa më e madhe e garuesve janë nën moshën 20 vjeçare. Njëri ndër favoritët, anglezi Benjy Fish është vetëm 15 vjeç dhe në intervistë për mediat e atjeshme ka thënë se nëse e fiton garën do t’ia blejë familjes së tij një shtëpi të re.

Kupa Botërore e Fortnite nis sot dhe do të përfundojë të dielën.