Hamilton triumfon në garën e Spanjës

Me triumfin e anglezit Lewis Hamilton u mbyll gara e Formula1 që u zhvillua sot në Barcelonë, garë kjo që ishte tejet interesante dhe dhuroi shumë emocione.

Gara filloi furishëm, me Vettelin që e parakaloi Hamiltonin me të filluar gara, e me Raikkonenin e Verstappenin që u detyruan ta lëshojnë garën për shkak të daljeve nga pista. Më vonë, edhe Bottas, i cili startoi i treti, u detyrua të largohet nga gara.

Dueli mes Vettelit dhe Hamiltonit ishte spektakular dhe vazhdoi deri në fund, ndërsa ishte anglezi Hamilton ai që në fund triumfoi, me parakalimin përfundimtar që erdhi afro 20 xhiro pa përfunduar gara.

Kryesimin Hamilton e mbajti deri në fund dhe e fitoi garën e Spanjës, ndërsa pas tij në podium përfunduan Vettel dhe Ricciardo.

Pas fitores së shënuar sot, Hamilton ngushton diferencën me gjermanin Vettel në renditjen e përgjithshme të kampionatit. Momentalisht, Vettel ka 6 pikë më shumë se Hamilton, që është ndjekësi më i afërt.