Kosova në FED Cup

Për herë të parë që nga themelimi, Përfaqësuesja e Kosovës në tenis do të marrë pjesë në FED Cup. Prej 11 deri më 16 prill në Ulqin do të zhvillohen ndeshjet e grupit 3 të FED Cup, grup në të cilin bën pjesë edhe Kosova. Lajmi është bërë i ditur nga faqja zyrtare e Federatës së Tenisit.

FED Cup është një garë botërore në konkurrencën e femrave dhe këtë vit për herë të parë edhe Kosova do të jetë pjesëmarrëse. Përveç Malit të Zi, i cili është nikoqir i turneut, aty do të marrin pjesë edhe 15 përfaqësuese nga e mbarë bota.

Përzgjedhësi i Përfaqësuesës së Kosovës, Arben Islami, ka publikuar listën e tenisereve të cilat do t’a përfaqësojnë vendin tonë në këtë garë. Lista përbehet nga Arlinda Rushiti, Edita Raca, Fiona Polloshka dhe Anduena Latifi.