BORA MPOSHTI PRIZRENIN
Mekic 29 pikë, Bora i kthehet fitores
2 April, 2025 @21:04
Bora ka shënuar fitore në ndeshjen që një xhiro para fundit të stinorit të rregullt nuk ndikon asgjë në tabelë të klasifikimit. Ekipi debutues në Superligë ka mposhtur Prizrenin në duelin e luajtur sonte, duke fituar ndeshjen me rezultat 102-87, pas një performance të madhe të Adem Mekicit, që kreu lojën me 29 pikë të shënuara, 8 asistime e 8 kërcime! Kjo ka qenë fitorja e parë e Borës, pas katër humbjeve radhazi.
Prizreni që luajti me gjashtë lojtarë kryesisht në ndeshje, ku të gjithë shënuan pikë dyshifrore luftën e humbi në çerek të fundit, kur dallimi u shtua në të mirë të vendasve (26-18), pasi që pjesa e parë ishte thuajse krejtësisht e barabartë (47-46). Tre lojtarë të ekipit dhanë nga 16 pikë, Jordan Johnson, Tervell Beck dhe i riu Erion Nixha. Ndërkaq me double-double ndeshjen e kryen Johnson që bëri edhe 12 asistime dhe Drilon Shala që shënoi 13 pikë e 11 kërcime.
Fitorja, lë Borën në pozitë të playoutit me mundësi shpëtimi të stinorit në këtë ndeshje. Bora do të përfundojë stinorin në pozitë të shtatë dhe aktualisht ka bilancin 9-18. Prizreni, tashmë i rënë nga Superliga, ka bilanc 5-22 dhe është i teti në renditje.
