Trepça fiton, Prizreni bie nga Superliga!

Pas humbjes në xhiron e kaluar, Trepça i është kthyer fitores duke e mposhtur Prizrenin! Në fitoren me afro 30 pikë rezultat, Trepça ka vulosur fatin e Prizrenit, që tashmë nuk ka gjasa matematikore për mbijetesë në Superligë.

Trepça fitoi duelin 103-75, ndërsa loja e mirë e vendasve në çerek të fundit bëri dallimin e madh në rezultat, ku shtatë lojtarë të mitrovicasve luajtën me pikë dyshifrore. Më efikasit nga ata ishin Michael Green dhe Junior Madut me nga 17 të shënuara, derisa Michael Myers dha 16 të tjera në fitore.

TABELA AKTUALE

Te Prizreni, që mund të shpresojë në mbijetesë vetëm nëse FBK vendos për zgjerimin e ekipeve në Superligë, Lenzelle Smith ka pasur performancë të lartë. Smith luajti me 32 pikë, 1 asistim e 7 kërcime. Tervell Beck dha 16 pikë, kurse 15 të tjera Jordan Johnson.

Derisa Trepça tashmë i afrohet Bashkimit lider në një fitore dhe ka bilanc aktual 17-9 mbyll xhiron XXVI në pozitë të dytë. Mitrovicasve në dy xhirot e mbetura të stinorit të rregullt u duhen për momentin edhe dy fitore për të siguruar gjysmëfinalen direkte të playoffit! Prizreni, i fundit në tabelë me bilanc 5-21 tashmë pjesë e Ligës së Parë, pas shtatë stinorë militimi të suksesshëm në elitë të basketbollit të Kosovës.