Humbja e rëndë nga Peja, largohet Murat Bilge!

Disfatë nga rivali i ashpër me 30 pikë dallim dhe 100 pikë të pranuara në ndeshje ka qenë mjaft! Prishtina ka ndarë rrugët me trajnerin turk Murat Bilge sot edhe zyrtarisht, duke bërë të ditur se ndihmës-trajneri Albert Sylejmani ka marrë në dorë timonin e ekipit të parë të bardhekaltërve. Humbja nga Peja ka qenë humbja më e thellë e Prishtinës këtë stinor në të gjitha garat!

Rekord-kampionia e Kosovës që nisi në mënyrën më të mirë të mundshme vitin 2025, duke shënuar për dy muaj e gjysmë fitore radhazi, mori teposhtëzen në ndeshje ndaj Yllit, pas nëntë fitoreve radhazi. Në mes të muajit mars, bardhekaltërit u mposhtën nga suharekasit duke mos arritur të shënojnë fitoren e dhjetë me radhë.

Pas asaj ndeshjeje pësoi rënia. Ekipi i Prishtinës humbi finalen e Ligës Unike nga Vëllaznimi duke mbetur pa trofe, ndërkaq në fundjavën që e lamë pas, saktësisht të dielën u demoluan në Pejë në humbjen me 30 pikë dallim, duke pësuar në çerekun e fundit 33-9!

Gjendje alarmante në ekipin me buxhet ndër më të madh në Kosovë, ndërkaq reagimi erdhi duke larguar trajnerin, kur kanë mbetur edhe dy xhiro të stinorit të rregullt dhe playoffi! Prishtina tash nën drejtimin e Sylejmanit gjithmonë kujdestar aty, do të kërkojë renditje sa më të mirë në dy përballjet e fundit ku pret Bashkimin lider dhe udhëton te Vëllaznimi!

Prishtina këtë stinor ende nuk ka fituar trofe. I ka mbetur vetëm edhe gara për titull kampioni. Titullin kampion Prishtina nuk e ka fituar që prej stinorit 2018/19! Kjo është periudha më e gjatë në basketbollin e pasluftës që kryeqytetasit nuk kanë shijuar titullin kampion! Ndërkaq janë ekipi i dytë në ligë me më së shumti disfata me 100+ pikë të pranuara (4) këtë stinor.