Forma e mirë e Yllit vazhdon, shkëlqen edhe ndaj Bashkimit lider

Ekipi suharekas, Ylli, ka vazhduar të shkëlqejë në xhirot e fundit të Superligës dhe sonte kanë mposhtur edhe liderin e Superligës, Bashkimi! Ekipi suharekas një mini-dallim në ndeshje e bëri gjatë çerekut të tretë (13-18) për të ruajtur këtë epërsi dhe të merr fitoren me 6 pikë epërsi në fund, 78-84.

Kjo ka qenë fitorja e katërt radhazi e Yllit të drejtuar nga Ales Pipan, ndërsa suharekasit përkundër mungesave të rëndësishme në ekip, kanë treguar angazhim të madh për të vazhduar serinë e fitoreve ndaj të gjitha skuadrave të katërshes së madhe (Prishtina, Trepça, Peja e Bashkimi) për tu ngritur në renditje.

TABELA AKTUALE

Jan Palokaj dhe William Tavares kanë dhënë nga 21 pikë në fitore, ndërsa Lis Shoshi kreu lojën me double-double prej 17 pikëve dhe 11 kërcimeve.

Bashkimi, përkundër angazhimit nuk ka arritur që të kthejë lojën në çerek të fundit (17-17), ndërsa Eric Copes ka qenë më i dalluari me 21 pikë e 12 kërcime në këtë ndeshje për portokallezinjtë. 17 pikë i dha Wendell Green, kurse 16 të tjera Dirk Williams.

Fitorja, bën që Ylli të dalë në pozitën e katërt sot, pasi që ka bilanc 13-13, ndërkaq Bashkimi mbetet lider, me 18-8 dhe i duhet edhe një fitore nga dy xhirot e fundit të stinorit të rregullt për të siguruar gjysmëfinalen direkte për playoff.