Nora e artë

Xhudistja që po shënon ngritje konstante në karrierën e saj ndërkombëtare, Nora Gjakova, ka arritur të stolistet me medalje të artë sot në turneun African Open që u mbajt në Tunis. 

Gjakova, pasi që arriti në gjysmëfinale u përball me spanjollen, Jaione Equisoain, ndërsa në finale mposhti francezen, Helene Receveaux. 

Pas Majlinda Kelmendit, që është kampione e dyfishtë botërore dhe që ka qenë e pranishme në këtë turne si shikuese, Gjakova po tregohet të shkojë bukur mirë pas hapave të saj. 

Nora është në kategori më të rëndë sesa Majlinda. Ajo garon në peshat deri në 57 kilogramë. 

Në rrugëtimin për finale ajo në xhiron e parë kaloi pa luftë, ndërsa në të dytën u përballë me Emilie Amaron nga Zvicra, për ta mposhtur pas saj edhe gjermanen, Viola Waechter, prej ku kërceu në gjysmëfinale.