Peja me një hap në gjysmëfinale

Skuadra e vetme kosovare që ka mbijetuar deri më tani në Ligën Ballkanike, Peja, nuk e ka ndërmend të ndalet me kaq.

Verdhezinjtë sot kanë shënuar një fitore shumë të rëndësishme, duke e mposhtur skuadrën nga Gjevgjelia, Kozuv, me rezultat 83-66.

Ndeshja u zhvillua në kuadër të çerekfinales së Ligës Ballkanike, e cila luhet me sistem vajtje-ardhje.

Pejanët e filluan ndeshjen me seri prej 10-0, ndërsa epërsinë që e krijuar në fillim, arritën ta ruajnë deri në fund, madje edhe e thelluan ate.

Hendikep i madh për Pejën ishte momenti kur trajneri Aleksandar Todorov u diskualifikua para përfundimit të pjesës së parë, për shkak të dy gabimeve teknike të njëpasnjëshme.

Megjithatë, as ky fakt nuk e pengoi Pejën që të shënoj fitore të thellë sonte në “Karagaç”.

Robert Abramovic me 20 pikë dhe Cameron Rundles me 19 sosh, ishin më meritorët për këtë fitore, ndërsa kontribut të madh dha edhe Alban Veseli që e mbylli takimin me 17 pikë të shënuara.

Në anën tjetër, Kenyon McNeal ishte i vetmi që u mundua ta pengojë këtë humbje të thellë për Kozuvin, duke shënuar 27 pikë.

Falë këtij rezultati, Peja është shumë afër gjysmëfinales, por më parë duhet kaloj me sukses edhe ndeshjen e kthimit që luhet në Gjevgjeli më 15 mars, nga e cila nuk duhet të pësoj me më shumë se 16 pikë.

PEJA

KOZUV