Prishtina fiton në Prizren, barazohet seria

Me fitoren e Prishtinës u mbyll ndeshja e dytë e serisë finale mes Bashkimit dhe Prishtinës në ‘Sezai Surroi’ të Prizrenit, ndeshja e cila dhuroi emocione deri në sekondat e fund, e në fund fitores iu gëzuan kryeqytetasit, për ta barazuar kështu serinë e ndeshjeve finale në 1-1.

Ndeshja ishte e barabartë pothuajse gjatë gjithë kohës, me epërsinë që kalonte herë në njerën anë e herë në tjetrën, mirëpo asnjëra skuadrër nuk shkëputej më shumë se 3 pikë nga tjetra.

Çereku i parë i takimit u mbyll me rezultat 22-21 në të mirë të Bashkimit, në një çerek ku loja e Bashkimit bartej nga treshja Black-Locke-Popovic. Në anën tjetër te kryeqytetasit dalloheshin Granit Rugova e Mike Moser.

Ngjajshëm si i pari, kaloi edhe çereku i dytë, ndërsa për t’u përmendur nga ky çerek është pasaktësia e madhe e të dy ekipeve nga gjuajtjet e lira, e në veçanërisht e skuadrës së Bashkimit.

SKEMA PLAY OFF

Me minutat që kalonin, loja bëhej më e fortë dhe lufta vazhdonte nga të dyja skuadrat, por që asnjëra prej tyre nuk shkëputej shumë në rezultat, duke bërë kështu që gjithçka të vendosej në çerekun e katërt. E aty skuadër më e mirë u tregua Prishtina, e cila përkundër disavantazhit 5-0 në fillim të çerekut, u këndell dhe e arriti fitoren falë paraqitjes shumë të mirë të dyshes Kemp-Hinds, të cilët shënuan treshe në momentet vendimtare, e në anën tjetër, prizrenasit e lëshuan disa herë mundësinë për ta barazuar rezultatin, gjë që iu kushtoi në rezultatin final.

Më i dalluari te prizrenasit sonte ishte Justin Black me 22 pikë, 3 kërcime e 5 asistime, derisa te Prishtina u veçua Mike Moser me 21 pikë, 10 kërcime e 3 asistime.

Për t’u përmendur është edhe fakti që në këtë takim të pranishme ishin të dy tifozëritë, Arpagjik’t dhe Plisat, të cilët krijuan një atmosferë impozante dhe e zbukuruan ndeshjen e dytë finale.

Ndeshja e tretë e serisë luhet të premten (19 maj) në kryeqytet.

Bashkimi

Sigal Prishtina