Si kaloi kreu i FIA-së në Kosovë?

“Jam i lumtur që gjendem në vendin tuaj. Në Kosovë duhet të punohet më shumë sa i përket infrastrukturës dhe rregullit në komunikacion. Kisha vizita në organe të rëndësishme të shtetit, te Kryeminstri, kryetari i komunës, tek ai i Kuvendit dhe disa zëvendësministra. Në të gjitha takimet që patëm u premtua investimi dhe vetëdijësimi për këtë sport, njëkohësisht edhe mbështetja e Federatës së Auto Sportit. Shihet që në Kosovë nuk mungon interesimi për këtë sport, por duhet shumë punë për të bërë”, është shprehur numri një i automobilizmit botëror

Ku shkoi dhe çka porositi Todt?

Presidenti i FIA-s, Jean Todt gjatë qëndrimit në i ka shprehur përshtypjet më të mira për vendin tonë, e në veçanti për automobilizmin kosovar. Ndërkaq, edhe zyrtarët tanë më të lartë shtetërorë janë shprehur të kënaqur me vizitën e numrit një të auto sportit botëror, të cilit i kanë premtuar se Federata e Auto Sportit e Kosovës do ta ketë përkrahjen e duhur institucionale.

Pas arritjes në Aeroportin “Adem Jashari”, Todt është pritur në Kryeministri, nga i pari i Qeverisë sonë, e pastaj së bashku edhe me kryetarin e FASK-ut, Ismet Rexhepin dhe anëarët e Bordit të kësaj Federate, kanë shkuar në Sheshin “Zahir Pajaziti”, ku automobilistët tanë i kishin ekspozuar veturat e tyre. Kryetari Rexhepi e ka falënderuar mysafirin për vizitën, por edhe për kontributin e tij në ndërkombëtarzimin e automobilizmit tonë.

“Së pari dua të të falënderoj për realizimin e premtimit të dhënë në takimin tonë të parë. Tani na mbetet ne të bëjmë gjithçka që është e mundur për ta arsyetuar ndihmën tuaj dhe pranimin tonë në FIA. Siç edhe jeni në dijeni, Federata jonë ka agjendë mjaft të ngjeshur të aktiviteteve, ku përveç pjesëmarrjes në gara të ndryshme ndërkombëtare, e kemi edhe kampionatin vendor me gjashtë gara malore, katër rrethore, katër karting dhe një ‘drag race’ shumë të fortë. Mirëpo, tash e tutje do ta kemi më lehtë, sepse ju kemi edhe ju përkrah nesh. Po ashtu besoj që edhe institucionet vendore do të na përkrahin me aq sa kanë mundësi. Ndër pritoritetet tona është ndërtimi i një shtegu të mbyllur, kur përveç automobilistëve, do të përfitonin edhe Ministria e Punëve të Brendshme, ajo e Infrastrukturës dhe Forca e Sigurisë. Qëllimi ynë është të krijojmë edhe siguri sa më të madhe në trafik dhe të shpëtojmë sa më tepër jetëra njerëzish. Për të arritur këtë qëllim na duhet ndihma nga të gjithë ata që kanë mundësi të kontribuojnë“, ka thënë Rexhepi.

Takimet dhe premtimet

Në anën tjetër, Todt, i cili është ndarë i kënaqur edhe me pamjet e ofruara në Sheshin “Zahir Pajaziti”, i ka takuar nga afër garuesit tanë dhe i ka inkurajuar për vullnetin e tyre, për rezultatet e arritura dhe punën që po e bëjnë. Presidenti Todt ka thënë se pranimi i FASK-ut në FIA është edhe një arsye më tepër për të punuar më shumë në mënyrë që automobilistët tanë të dëshmojnë se e kanë merituar të garajonë të barabartë me sportistët e vendeve tjera.

Para garuesve ka folur edhe kryeministri i Kosovës, i cili ndër të tjera tha: “Me presidentin Todt biseduam për përkrahjen e tij dhe iu falënderuam për këtë përkrahje të madhe. Biseduam veçmas për sigurinë në rrugë, sepse është edhe përfaqësues i sekretarit të Kombeve të Bashkuara dhe është zë shumë i rëndësishëm i sigurisë në rrugë. U zotuam se ne do të marrim të gjitha masat në mënyrë që të siguromë fëmijët, udhëtarët, sepse ata gjithmonë janë të rrezikuar gjatë daljes në rrugë që nga edukimi, nga infrastruktura dhe nga mjetet tjera ndihmëse”.

Gjatë të premtes, Todt i pati edhe një sërë takimesh me zyrtarët e vendit tonë, duke filluar me kryetarin e Komunës së Prishtinës.

Numri një i kryeqytetit premtoi mbështetje për Federatën e Auto Sportit për aq sa është në kompetencën e tij, duke bërë apel që qytetarët të kenë më tepër kujdes gjatë ngasjes së automjeteve të tyre. Jean Todt ishte më i fokusuar në problemet me infrastrukturën në të cilën zhvillohen garat duke bërë apel që organet e sigurisë të ndërmarrin masa për të pasur situatën në kontroll, derisa kërkoi nga kryetari mbështetje për FASK-un.

Ka interesim për autosporte në Kosovë

Më pas Todt së bashku me kryetarin Rexhepi janë pritur edhe nga kryeparlamentari i Kosovës, i cili e falënderoi Todtin për mbështetjen e tij personale për anëtarësimin e Kosovës në Federatën Ndërkombëtare të automobilizmit, si një e arritur tjetër në vazhdën e përfshirjes së Republikës së Kosovës në mekanizmat dhe institucionet ndërkombëtare. Agjenda e presidentit Todt ka përfunduar me vizitën Ministrinë e Infrastukturës, ku po ashtu është falënderuar për ndihmën e tij dhënë FASK-ut, ndërkohë që është premtuar përkrahje më e madhe për Federatën e Auto Sportit.

Para largimit nga vendi ynë, presidenti Todt, është shprehur: “Jam i lumtur që gjendem në vendin tuaj. Në Kosovë duhet të punohet më shumë sa i përket infrastrukturës dhe rregullit në komunikacion. Kisha vizita në organe të rëndësishme të shtetit, te Kryeminstri, kryetari i komunës, tek ai i Kuvendit dhe disa zëvendësministra. Në të gjitha takimet që patëm u premtua investimi dhe vetëdijësimi për këtë sport, njëkohësisht edhe mbështetja e Federatës së Auto Sportit. Shihet që në Kosovë nuk mungon interesimi për këtë sport, por duhet shumë punë për të bërë”.