Sigal Prishtina largohet nga Liga Ballkanike

Kampionja në fuqi e Ligës Ballkanike, Sigal Prishtina, nuk do të jetë më pjesëmarrëse e kësaj gare.

Ekipi prishtinas sot me anë të një njoftimi për media, ka bërë të ditur që në stinorin e ardhshëm në do të luajë në Ligën Ballkanike, për të pasur koncentrim në garat europiane të FIBA-s dhe ato vendore.

“Ju njoftojmë që pas 4 vitesh pjesëmarrje në Ligën Ballkanike SIGAL UNIQA BIBL, garë në të cilën fituam dy herë titullin kampion, bordi drejtues i klubit ka vendosur për të ndërprerë pjesëmarrjen në këtë garë.

I gjithë fokusi i klubit do të jetë në garat Europiane te FIBAs dhe ato vendore.

Poashtu menaxhmenti i klubit ka vendosur që për edicionin e ardhshëm të konkurrojë për anëtarësim në ligën tjetër regjionale ABA LIGA.

Ne me këtë rast falënderojmë udhëheqësit e Ligës Ballkanike për mundësinë e dhënë për thyerjen e izolimit të basketbollit Kosovar si dhe ngritjen e cilësisë së Klubit të Basketbollit Sigal Prishtina dhe basketbollit Kosovar në përgjithësi,” thuhet në njoftim.

Sigal Prishtina sivjet është eliminuar heret nga Liga Ballkanike, duke mos mundur të arrijë kualifikimin nga faza e dytë grupore.