Të rinjtë e Vëllaznimit në turnir në Suedi

Ditën e shtunë (29 dhjetor) të rinjtë e klubit basketbollistik Vëllaznimi do të nisen drejt Suedisë për të marrë pjesë në turneun Lundaspelen 2019, i cili mbahet mes datave 2 dhe 5 janar të vitit 2019.

Ky turnir organizohet për grupmosha të ndryshme dhe sivjet marrin pjesë një numër rekord i skuadrave, gjithsej 376, ndërsa klubi gjakovar, i cili është klubi i vetëm nga Ballkani që merr pjesë, në këtë turne do të garojë me grupmoshat U16 dhe U18. Përveç Vëllaznimit, pjesëmarrëse do të jenë skuadra të ndryshme nga shtete si Gjermania, Norvegjia, Franca e Danimarka.

Turniri në fjalë mbahet në qytetin e Lundit dhe sivjet organizohet për herën e 41-të me radhë, derisa klubi i Vëllaznimit është klubi i parë shqiptar që merr pjesë në turneun në fjalë.