Tinejxheri amerikan fiton Kupën e Botës në Fortnite dhe shpërblimin 3mln dollarësh

Djaloshi 16 vjeçar nga SHBA, Kyle Giersdorf, ka fituar garën e Kupës së Botës në Fortnite për të fituar 3 milionë dollarë shpërblim.

E tërë TOP 4-shja fituese e kësaj gare është bërë milioner dje. Ndërsa çdo lojtar i këtij e-sporti që ka arritur të futet në Kupën Botërore ka marrë së paku 50 mijë dollarë.

Theksojmë edhe njëherë, fituesi i Fortnite është shpërblyer më shumë sesa fituesi i Wimbledonit këtë vjet.

“Fjalët s’mund ta përshkruajnë këtë ndjenjë. Jam shumë-shumë i lumtur,” ka thënë Giersdorf që vjen nga Pensylvania. ”Çdo gjë që e kam bërë, është shpaguar. Thjesht, çmenduri; S’mund ta besojë.”

Në Kupën e Botës kanë ardhur lojtarë nga 30 shtete të ndryshme prej të cilëve 70 kanë qenë nga SHBA. Fortnite është lojë ku 100 lojtarë arrijnë në ishull, ku duhet të gjejnë armë, struktura ndërtuese dhe duke eliminuar njëri-tjetrin nga gara mbetet vetëm fituesi në ishull.

Kjo lojë, jashtëzakonisht e popullarizuar ka 200 milionë lojtarë të regjistruar në botë, e shkarkueshme pa pagesë, por lojtarët harxhojnë para në blerje të gjësendeve ndihmuese për lojë.