Vëllaznimi fiton pas vazhdimeve, ngjitet mbi Prizrenin

Një ndeshje tejet interesante është zhvilluar sonte mes Ponte Prizrenit dhe Vëllaznimit në Suharekë.

Mes skuadrave në fjalë nuk pati fitues pas kohës së rregullt, e cila përfundoi 78-78, e vazhdimin 5-minutësh e fitoi skuadra gjakovare 8-13, për ta mbyllur ndeshjen me rezultatin përfundimtar 86-91.

TABELA AKTUALE

Vendimtare në kohën shtesë ishin 8 pikët (dy treshe) e Harris dhe një tresh i Zekiqit për gjakovarët, të cilët kjo fitore i ngritë mbi Prizrenin në renditje.

Jordan Harris sonte ka qenë i pakapshëm. Amerikani ka qenë snajper i vërtetë sonte, ndërsa ka shutuar 13 herë për tri pikë duke shënuar 10, për të kryer lojën me 35 pikë, bashkë me 6 asistime e 4 kërcime.

E tërë pesëshja e parë e Vëllaznimit shënoi pikë dyshifrore, ndërsa Burim Zekiqi pas Harrisit shënoi më së shumti. Mitrovicasi dha 15 pikë, të gjitha treshe, duke shutuar 5/10 për tri pikë!

Te Ponte Prizreni, që në çerekun e katërt kaloi në epërsi 6-pikëshe dhe ishte afër fitores kur kishin mbetur edhe 1.30 minuta deri në fund të lojës, më efikasi ka qenë Adam Grant me 21 pikë. Edhe ky ishte mjaft i mirë në gjuajtjet nga distanca, duke shënuar 5/8 për tri pikë!

Leon Gilmore kreu lojën me double-double prej 14 pikësh e 10 kërcimesh, që nuk mjaftoi për më shumë. Duhet theksuar se bashkëpunimi ekipor ka qenë më i lartë te Vëllaznimi dukshëm sonte, që tregon edhe numri i asistimeve nga skuadrat. Derisa në tërë ndeshjen Ponte Prizreni bëri 7 asistime në total, Vëllaznimi i regjistroi 25.

Pas kësaj ndeshjeje, Vëllaznimi bëhet me bilanc 8-12 ndërsa Prizreni 7-13, i parafundit në renditje.