As 48 orë pushim i plotë, para ndeshjes së radhës

Prej se përfundoi ndeshja e mbrëmshme Bashkimi-Academic pak pas orës 21:00 (5 dhjetor), lojtarët e Bashkimit nuk do të mund të pushojnë as 48 orë para fillimit të ndeshjes së radhës në kuadër të BIBL.

Kjo, pasi që dueli i xhiros së parë ndaj Rilski Sportistit, është përcaktuar të luhet nesër mbrëma (7 dhjetor) me fillim në ora 19:30 në Sezai Surroi të Prizrenit, ku portokallezinjtë presin ekipin bullgar.

Rilski Sportist deri tash është treguar i pamëshirshëm në ligën ballkanike pasi që ka regjistruar fitore ndaj të gjithë kundërshtarëve që i kanë dalë përpara.

TABELA AKTUALE E BIBL

Së fundi, ata mposhtën Tiranën 78-99 në Feti Borova të Tiranës (ndeshje që gjithashtu u zhvilla dje, por nisi pak më heret sesa Bashkimi-Academic), duke ua shkaktuar humbjen e parë në shtëpi Gerti Shimës e Endrit Hysenagollit me shokë.

Bashkimi në anën tjetër, dje ka mposhtur me lojë të sigurtë Academic Bultexin, ndërsa në Sezai Surroi ende nuk din për humbje.

Pritet ndeshje interesante, pasi që Rilski s’di për humbje në BIBL ende (4-0) kurse Bashkimi me bilanc (2-2) nuk ka humbur si vendas.