Edhe sonte trajner Dardan Berisha

Basketbollisti më i mirë i Kosovës, Dardan Berisha, edhe sonte do të jetë në rolin e trajnerit të Pejës.

Njoftimin e ka bërë të ditur KB Peja sot, duke treguar se trajneri Dragan Radovic dhe ndihmësi i tij Petrit Zeqiri, vazhdojnë të jenë të izoluar për shkak të infektimit me COVID-19.

“Ekipi është ende pa trajnerin Radovic dhe ndihmësin Zeqiri, prandaj do të udhëhiqet edhe sonte nga kapiteni Dardan Berisha,” ka shkruar KB Peja në njoftimin e botuar orë më parë.

Në njërin ndër stinorin më interesant në histori të Superligës, Peja ka bilans 12-11 dhe përkundër se është në pozitën e katërt në renditje tabelare, ende nuk e ka të sigurt PlayOffin 4 xhiro para përfundimit të pjesës së rregullt.

Verdhezinjtë sonte ndeshen me liderin e Superligës, Ponte Prizreni, që gjithashtu sot ka zyrtarizuar edhe ish-trajnerin e Bashkimit, Illmen Bajra, si staf shtesë në klub, ku do të luajë rolin e koordinatorit të skuadrës.

Ponte Prizreni futet në këtë ndeshje pas dy fitoreve radhazi, derisa Peja e drejtuar nga Dardani edhe në duelin e xhiros së kaluar, është duke kërkuar fitoren e parë pas 5 humbjeve rresht.