ÇIKLIZËM
Natë britanike në velodrom
17 August, 2016 @1:07
Dy tituj dhe katër medalje është bilanci i ditës së fundit në çiklizëm palestre për Britaninë e Madhe. As rekordet individuale nuk munguan.
Laura Trott u bë sportistja e parë britanike me katër të arta në lojëra olimpike pasi fitoi disiplinën më të rëndë në këtë sport, omnium. Ajo ia doli të mbroj titullin nga Londra duke lënë përsëri mbrapa amerikanen Sarah Hammer e cila pati 206 pikë, plotë 24 më pak se Trott. E bronzta i takoi Jolien D’Hoore nga Belgjika.
Trott, 24 vjeçare kishte fituar edhe ndjekjen ekipore në Rio dhe Londër.
Ditë e suksesshme ishte edhe për të dashurin e saj, Jason Kenny. Ai me fitoren në Keirin ku mëzi patëm një start të rregullt pas tri tentimeve, ngjiti në gjashtë numrin e medaljeve të arta në Lojërat Olimpike, me gjysmën të fituara në Rio. Kenny ishte shpallur fitues edhe në sprint individual dhe atë ekipor.
E argjendta i takoi Matthijs Buchli nga Holanda derisa Azizul Hasni Awang nga Malajzia mori të bronztën.
Britanikët nuk arritën të marrin të artën në sprint të femrave, por dy medaljet tjera shkuan në Ishull.
Kampionia e shtatëfishtë botërore, dhe e arta nga Londra në sprint ekipor, gjermania Kristina Vogel mori të artën duke triumfuar 2-0 në finale ndaj britanikes Rebecca James. Bashkëkombësja e saj Katy Marchnat mori të bronztën pasi me rezultat identitk mposhti Elis Ligtlee nga Holanda në luftë për këtë medalje.
Nga 14 disiplinat në çiklizëm palestre, gjashtë të arta i takuan përfaqësuesve të Britanisë së Madhe. Ata siguruan edhe katër të argjendta dhe dy të bronzta për totalin prej 12 medaljeve. Holanda i ndjek me katër medalje, prej të cilave dy tituj.