KAJAK
Medaljet e para në kajak
16 August, 2016 @18:22
Dallimi ndërmjet lundrimit dhe kajakut është që tek sporti i parë, lopatat janë të shtrënguara për varke. Tek kajaku ato janë të lira dhe lundruesi menaxhon si të do me to. Janë dy lloje lopata në kajak, ato që kanë lopatë në të dy anët – Kajak, dhe ato që kanë lopatë në vetëm një anë të tyre – C(kanu). Distancat në kajak janë të ndryshme – 200m, 500m, 1000m.
Femrat zhvilluan gjysmën e disiplinave qysh në ditën e parë të finaleve. Në K1 në 200m, e arta përsëri i takoi Lisa Carrington nga Zelanda e Re. Ajo përfundoi para polakes Marta Walczykiewicz dhe Inaa Osypenko-Radomska nga Azerbajxhani.
Në dyshe, K2 në 500m më të mirat ishin hungarezet Gabriella Szabo e Danuta Kozak. Ato lan mbrapa kampionet e Londrës, Franziska Weber dhe Tina Dietze nga Gjermania. Ndërkohë Karolina Naja dhe Beata Mikolajczyk nga Polonia morën të bronztën.
Tek meshkujt në C1 në 1000m, gjermani Sebastian Brendel mbrojti titullin e Londrës me kohë 3:56.926. Braziliani Isaquias Queiroz mori të argjendtën, derisa e bronzta i takoi Serghei Tarnovschi nga Molldavia.
Në të njëjtën distancë, por në K1 e arta i takoi spanjollit Marcus Walz. Ai përfundoi garën larg para çekut Josef Dostal dhe rusit Roman Anoshkin, të cilët morën dy medaljet tjera.