Peja mposhti Prishtinën në duelin e parë çerekfinal

Derbi i vjetër i basketbollit kosovar në kuadër të çerefinales së Kupës i takoi Pejës sonte, që mposhti Prishtinën 74-71. Kjo ka qenë ndeshja e parë çerekfinale e Kupës, ndërsa ajo e kthimit luhet pas një jave. Në gjysmëfinale kualifikohet skuadra që arrin rezultat më të mirë të përgjithshëm pas dy ndeshjeve.

Peja tregoi “dhëmbët” në çerek të fundit të ndeshjes (20-13), për ta përmbysur epërsinë e Prishtinës dhe për të fituar ndeshjen me 3 pikë dallim. Me 23 pikë më efikasi ka qenë Tristan Ikpe, kurse Dardan Berisha sonte ka qenë në element me 16 pikë të shënuara.

Te Prishtina, që megjithatë ka shpresa për ndeshjen e kthimit, më efikasi ka qenë Josh Nzeakor që shënoi 22 pikë dhe bëri 8 kërcime në ndeshje. Pos tij, ka qenë Qua Grant që ka dhënë pikë dyshifrore te bardhekaltërit. Grant kreu ndeshjen me 13 pikë të shënuara.

Dallimi tre pikësh lë ndeshjen e kthimit plotësisht të hapur, ku pas një jave në “Pallatin e Rinisë dhe të Sporteve” pritet luftë e madhe për gjysmëfinale. Kjo ka qenë fitorja e parë e Pejës ndaj Prishtinës nën drejtimin e trajnerit Daniel Nelson.