Përfundon xhiroja e parë e stinorit të ri

Prishtina ka fituar bindshëm ndaj Zhegrës, ndërsa Vëllaznimi ndaj Llapit. Me këto dy ndeshje të zhvilluara të dielen është mbyllur java e parë në Superligën e Kosovës në hendboll (meshkujt).

Prishtina e riorganizuar dhe me pretendime të mëdha për këtë edicion, e mposhti Zhegrën me rezultatin 31:23. Ndërkohë ekipi gjakovar Vëllaznimi fitoi ndaj Llapit në udhëtim me shifrat 39:26.

Të shtunën u luajtën dy ndeshje tjera të javës së parë.

Trepça, që ka nisur vonë përgatitjet dhe që luajti pa gjysmën e lojtarëve, është mposhtur bindshëm në “Minatori” nga Drita me shifrat 28:23.

Derbi vushtrrias në mes Vushtrrisë dhe Samadrexhës u mbyll me rezultatin e barabartë, 28:28.

Java e parë, përkatësisht kampionati, është hapur të premten me ndeshjen mes Besa Famgas dhe Kastriotit. Kampionia Besa nisi furishëm, me fitoren 36:21.

Te femrat janë luajtur dy ndeshje të javës së parë. Të shtunën, Prishtina fitoi ndaj Dritës me shifrat 34:27, ndërsa Istogu fitoi thellë ndaj Samadrexhës, 43:6. Ndeshjet Kastrioti – Shqiponja dhe Vëllaznimi – Vushtrria pritet të luhen më 23 shtator.