Prishtina me kërkesë zyrtare për ABA League

Sigal Prishtina ka bërë kërkesë zyrtare për pjesëmarrje në Ligën e Adriatikut, e njohur ndryshe si ABA League, për stinorin 2017/18.

Kryetari i Sigal Prishtinës, Blerand Stavileci, ka dërguar një letër në drejtim të kryetarit të ABA Ligës, Mladen Veber, ku ka paraqitur kërkesën e klubit bardhekaltër.

Në letër thuhet se Sigal Prishtina është e gatshme për pjesëmarrje në këtë ligë, ndërsa në rast të pëlqimit të tyre, janë të gatshëm që menjëherë t’i fillojnë procedurat e regjistrimit.

ABA League është liga më e fortë në rajon, ndërsa në te, një numër i konsiderueshëm i skuadrave pjesëmarrëse është nga Serbia, duke përfshirë edhe Crvena Zvezdan dhe Partizanin.

Ditë më parë, Sigal Prishtina kishte bërë të ditur që nuk do të jetë më pjesë e Ligës Ballkanike, BIBL.