Sot, Kosova-Serbia

Hendbollistet e Kosovës U-19 sot do të ndeshet me Serbinë në rrugën e tyre për kualifikim në europian, në ndeshjen e Grupit 3 kualifikues. 

Edhepse reprezentacioni i Kosovës konsiderohet autsajder në garë për kualifikim, vashat tona do të bëjnë çmos që të tregojnë së pari lojë të mirë para kundërshtarëve të grupit. 

Të gjitha ndeshjet e këtij grupi kualifikues luhen në Rumani, ku Kosova pas ndeshjes së sotme ndaj Serbisë do të takohet edhe me Sllovakinë e Rumaninë, gjatë fundjavës, që edhe do të përcaktojë se cilat dy skuadra do të udhëtojnë për në pjesën finale të europianit U-19, që mbahet në Spanjë, në qytetin e Valencias prej 23 korrikut deri më 2 gusht të këtij viti. 

Selektori i Kosovës, Florent Beqiri, ka pranuar se skuadrat tjera në grup janë shumë më cilësore sesa Kosova, por sidoqoftë, vashat do të angazhohen maksimalisht për rezultat pozitiv. 

Ndeshja Kosova-Serbia fillon në ora 16:00.