Bashkimi drejt FIBA Europe Cup!

Për herë të paër në histori të klubit, KB Bashkimi do të mund të merr pjesë në gara ndërkombëtare të organizuara nga FIBA Europe këtë stinor. Njoftimin e ka thënë Kushtrim Kabashi, president i klubit prizrenas, në një emision televiziv.

Ai ka konfirmuar pjesëmarrjen e ekipit portokallezi aty, ndërsa ka bërë të ditur se kanë kompletuar edhe dokumentacionin e nevojshëm për pjesëmarrje.

“Po. Ne e kemi konfirmuar pjesëmarrjen. Kemi plotësuar dokumentacionin si prej anës së klubit ashtu edhe prej FBK-së. E kemi marrë shumë seriozisht këtë dhe nuk do të hymë aty sa për të marrë pjesë.” — ka thënë ndër të tjera zyrtari i lartë i ekipit prizrenas, Kushtrim Kabashi në emisionin Asist.

Përndryshe, Bashkimi deri tash në histori të basketbollit të pavarur të Kosovës është bërë vetëm një herë kampion i Kosovës, ndërsa ka disa finale të humbura të playoffit. Sa i përket garave ndërkombëtare, ata kanë marrë pjesë vetëm në Ligën Ballkanike deri tash, ku njëherë kanë arritur gjithashtu në finale të Final Fourit, të cilën e kanë humbur duke u bërë nënkampionë.

FIBA Europe Cup, është gara e dytë më e rëndësishme e basketbollit evropian që organizohet direkt nga FIBA Europe, ndërsa nga ekipet kosovare aty kanë marrë pjesë më parë Prishtina, Trepça, Peja dhe Ylli. Për Bashkimin, kjo do të jetë hera e parë që do të merr pjesë aty.