Bashkimi eliminon Vëllaznimin dhe arrin finalen e Kupës së Kosovës

Në një ndeshje mjaft interesante dhe me dramë në secilin moment në fushë të lojës, Bashkimi ka arritur që të shënojë fitore me rezultat të mjaftueshëm për të përmbysur epërsinë 9 pikëshe të Vëllaznimit nga ndeshja e parë dhe për të siguruar biletën për finalen e Kupës së Kosovës, duke i eliminuar gjakovarët.

Bashkimi fitoi ndeshjen me rezultat 90-73 dhe arriti finalen e Kupës.

Ndeshja që prej fillimit tregoi se do të jetë mjaft dramatike! Bashkimi e nisi me 9-0, për tu kthyer Vëllaznimi më pas në lojë dhe për të mbyllë pjesën e parë në epërsi, 35-41! Në pjesë të dytë Bashkimi nisi rikthimin.

Momentet

Në atmosferë të jashtëzakonshme në “Sezai Surroi” ku salla ishte plotësisht e mbushur me publik, pjesa e dytë nisi më mirë për prizrenasit të cilët dalëngdalë filluan të përmbysin epërsinë e Vëllaznimit dhe të kërkojnë avantazhin minimal prej 10 pikëve sa i nevojitej për të shkuar në finale.

E në çerekun e fundit Bashkimi shtoi epërsinë dhe siguroi finalen pak minuta para fundit.

Mungesa e Arian Azemit, që u përjashtua për teknike - ishte fatale për Vëllaznimin nga ana e lojtarëve vendor, ndërsa humbjes së gjakovarëve i kontribuoi edhe mos-shënimi i mjaftueshëm i gjuajtjeve të lira, ku Vëllaznimi dha 16 sosh prej 27 tentimeve!

SKEMA E KUPËS SË KOSOVËS

Bashkimi në anën tjetër dha 27 prej 33 gjuajteve të lira, kurse për treshe “snajperët” funksionuan, ku shuti i përgjithshëm shkoi me saktësi të madhe prej 46% [13/28].

Akterët kryesorë

Lejson Zeqiri shënoi 22 pikë, duke shutuar 4/5 për tri pikë. Ai realizoi edhe 5 kërcime në fitore, duke dalë nga ndeshja në minutën e fundit të lojës për shkak të 5 gabimeve personale. 19 pikë i dha Wendell Green, bashkë me 5 asistime, ndërsa nga 11 sosh shënuan Valon Bunjaku e Mack Smith. Smith regjistroi edhe 5 asistime e 8 kërcime.

22 pikët e Jericole Hellemsit nuk mjaftuan. Ai bëri edhe 3 asistime e 5 kërcime, për të dalë në momentet e fundit nga ndeshja për shkak të një lëndimi, që shpresohet të jetë i lehtë. Pos tij vetëm edhe Trey Anderson ka dhënë pikë dyshifrore te ekipi i drejtuar nga Jeronimo Sarin. Anderson kreu lojën me 17 pikë!

Finalet dhe finalja

Dy herë fitues i Kupës, në basketbollin e pavarur të paraluftës, Vëllaznimi nuk ka arritur asnjëherë në periudhën pas-lufte në finale të Kupës! Kjo ishte hera e parë për kuqezinjtë që ishin afër të luftojnë për një trofe të madh në Kosovë në finalen e parë të tyre në të gjitha garat e nivelit elit të Kosovës! Por, nuk e arritën.

Bashkimi ka pasur katër finale të humbura prej se fitoi për herë të parë dhe të fundit Kupën e Kosovës, në stinorin 2000/01! Herën e fundit, Bashkimi finale të Kupës ka luajtur në stinorin 2021/22 në “Karagaç” ku u mposhtë nga Trepça!

Trajneri i ri i Bashkimit, Sasa Jankovic pas ndeshjes tha që beson në fitore në finale. E, kësaj radhe - mundësia paraqitet përsëri, kurse Trepça e Bashkimi do të takohen në finalen e madhe që luhet në “Pallatin e Rinisë dhe të Sporteve” të Prishtinës më 12 shkurt, ku skuadrat në fjalë do të luftojnë për trofeun e parë të vitit 2025!