Bashkimi triumfon në derbi ndaj Yllit

Bashkimi fitoi derbin e ditës ndaj Yllit në Suharekë sonte. Pas fillimit të mirë të Yllit në pjesë të parë, ka qenë çereku i tretë kur Bashkimi bëri dallimin kryesor në ndeshje dhe doli në epërsi 8 pikëshe 10 minuta para fundit, që dolën të jenë vendimtare, 82-88.

Prizrenasit luajtën me gjashtë lojtarë këtë ndeshje dhe që të gjashtit shënuan pikë dyshifrore, derisa Stratos Koukoulekidis nuk i dha fare hapësirë basketbollistëve tjerë në bankë.

TABELA AKTUALE E SUPERLIGËS

Mikaile Tmusic shënoi 20 pikë e 5 asistime, Edmond Kryeziu 17 pikë, Aaron Moss 14 pikë, 17 kërcime, 6 asistime, Vinny Zollo 13 pikë dhe Altin Morina e Urim Zenelaj shtuan nga 12 të tjera në fitoren e radhës për portokallezinjtë.

Në anën tjetër, te vendasit, performanca e jashtëzakonshme e Mike Harmonit shkoi kot. Amerikani shënoi 33 pikë, 5 asistime dhe 4 kërcime - që s’mjaftuan.

Artin Gashi kontribuoi me 14 pikë e 7 kërcime, ndërsa Leonard Mekaj shtoi 12 pikë të tjera.

Pas këtij dueli, Bashkimi i dyti në renditje ka bilanc 13-5, ndërsa Ylli i treti 10-8.