Belegu takon kryetarin e FIBA Europe

Kryetari i Federatës së Basketbollit të Kosovës, Erolld Belegu, sot është takuar me kryetarin e FIBA Europe, Turgay Demirel.

Takimi është realizuar në Stamboll të Turqisë, ndërsa gjatë takimit Belegu e njoftoi kryetarin e FIBA Europe për zhvillimet më të reja në basketbollin kosovar, derisa Demirel edhe një herë e ka shprehur gatishmërinë e tij dhe të institucionit që ai e udhëheq për të ndihmuar në zhvillimin e basketbollit kosovar nëpërmjet shkollimit të trajnerëve, gjyqtarëve, vëzhguesve, stafit të FBK-së dhe nëpërmjet projekteve të ndryshme për kategori të reja.

Demirel në të njëjtën kohë e ka njoftuar Belegun për zhvillimet më të reja në FIBA që kanë të bëjnë si me zhvillimet e garave në nivel të klubeve, po ashtu edhe në atë të Përfaqësueseve dhe zhvillimet e tjera brenda FIBA-s në nivel të organizimit si institucion.