SHQIP NË BOTË
Edon Maxhuni shkëlqen në fitoren e Long Beach State
14 January, 2018 @11:41
Vazhdon shkëlqimi i Edon Maxhunit në ligën e kolegjeve në SHBA.
Në vitin e tij të parë me skuadrën e Long Beach State, basketbollisti kosovar me nënshtetësi finlandeze vazhdimisht po shfaq paraqitje të mira në pozitën e organizatorit.
Në ndeshjen e luajtur në orët e hershme të mëngjesit të sotëm ndaj UC Riverside University, Maxhuni ishte startues për skuadrën e tij dhe luajti për gjithsej 24 minuta, në të cilat ai ishte lojtari i dytë më efikas i skuadrës së tij.
Edoni, 188 cm i gjatë, luajti me 16 pikë, 2 asistime, 2 kërcime dhe 3 topa të vjedhur, duke qenë një nga më meritorët për fitoren e shënuar nga Long Beach State.
“Ishte fitore e madhe. Jemi një skuadër e mirë kur bëhet fjalë për gjuajtjet e lira, si dhe kemi lojtarë që kanë aftësi për të depërtuar në zonën kundërshtare. Kjo na ndihmoi që ta fitonim këtë takim.” - u shpreh Maxhuni për Big West TV pas ndeshjes.
Ndeshjen e ardhshme Long Beach State e luan ndaj UC Davis në mëngjesin e ditës së enjte sipas kohës tonë lokale.
