Fund dramatik në Gjakovë, Vëllaznimi mposhtë Bashkimin pas vazhdimeve

Ndeshe tejet dramatike pamë sonte në “Shani Nushi” të Gjakovës, me fituesin mes Vëllaznimit dhe Bashkimit që u caktua pas vazhdimit prej 5 minutave, me kohën e rregullt që u mbyll me rezultat të barabartë 65-65.

E në fund triumfit iu gëzuan gjakovarët, që përballjen e mbyllën me fitore 78-67.

TABELA AKTUALE

“Kuqezinjtë” ishin në epërsi të lehtë për më shumë se 30 minuta. Për herë të parë në ndeshje Bashkimi kaloi në fillim të çerekut të katërt, çerek i cili pastaj u bë tejet interesant dhe dramatik.

Kur kishte mbetur më pak se një minutë lojë në fund dhe rezultati ishte 65-64 për vendasit, gjyqtarët vendosën që ta zbraznin sallën për shkak të fyerjeve në kor nga tifozët vendas. Në ato sekonda të mbetura pas rikthimit në parket pas pushimit të detyrueshëm ndërkohë që salla po zbrazej, u shënua vetëm një pikë nga Bashkimi dhe ndeshja shkoi në vazhdime.

Në vazhdimin prej pesë minutave, Vëllaznimi u tregua skuadër më e mirë. Ky 5-minutësh u mbyll 13-2 dhe rrjedhimisht ndeshja u mbyll me fitoren e vendasve.

Michael Nuga me 25 pikë, 4 kërcime e 3 asistime ishte më i dalluari te Vëllaznimi sonte, e te Bashkimi shkëlqeu Lejson Zeqiri me 19 pikë, 2 kërcime e 1 asistim.

Meritor në këtë triumf të gjakovarëve ishte edhe Arian Azemi, që u tregua tejet i mirë me disa vjedhje të topit në mbrojtje në momentet kritike të ballafaqimit.

Për Bashkimin kjo ishte humbja e dytë me radhë në ligë, kurse Vëllaznimi i rikthehet fitoreve pas humbjes nga Peja xhiron e kaluar.