Jean-Denys Choulet vjen për të ndjekur Superligën, para ndeshjeve me Kosovën

Selektori i ri i Kosovës në basketboll, francezi Jean-Denys Choulet këtë fundjavë do të jetë në Kosovë ndërsa do të mundohet t’i ndjekë ndeshjet e Superligës për të shikuar nga afër lojtarët e përzgjedhur për përballjet e nëntorit në kuadër të parakualifikimeve evropiane për Mundobasket.

Njoftimin e ka dhënë FBK-ja, ndërsa Choulet 66 vjeç, do të jetë të premten në Kosovë ku pas takimit me drejtuesit dhe zyrtarët dhe pas vikendit, të hënën do të mbajë një konferencë për shtyp. Sipas FBK-së selektori francez i posa-emëruar i Kosovës do të flet edhe për planet e tij me reprezentacionin.

Grumbullimi i parë i basketbollistëve do të mbahet më 12 nëntor, ndërsa më 21 e 24 nëntor Kosova do të luajë ndeshjet parakualifikuese ndaj Zvicrës dhe Irlandës përkatësisht. Kosova në ndeshjet e para, ka shënuar një fitore dhe një humbje. “Dardanët” kanë mposhtur Irlandën në shtëpi, ndërsa kanë humbur ndeshjen si mysafir nga Azerbajxhani. Lidere e Grupit A parakualifikues është Zvicra 2-0, ndërsa e pasojnë Azerbajxhani e Kosova me 1-1, derisa Irlanda e fundit është me bilanc 0-2.

“Takimet zhvillohet në kuadër të parakualifikimeve evropiane për Kupën e Botës 2027. Kosova ka një fitore dhe një humbje. Sfidat e fundit do të jenë në shkurt të vitit të ardhshëm, kur do të presim Zvicrën dhe Azerbajxhanin.
Jean-Denys Choulet ka nënshkruar kontratë 3 vjeçare me Federatën e Basketbollit të Kosovës.” — ka shkruar FBK në fund të njoftimit.

Kosova është mysafire e Zvicrës më 21 nëntor në Bern (19:00), ndërsa do të luajë edhe ndeshjet e dytë jashtë, ku pastaj udhëton për në Irlandë më 24 nëntor në përballjen që do të luhet në Dablin (18:00). Në dy përballjet e fundit të kësaj faze, Kosova pret Azerbajxhanin së pari më 20 shkurt, e tre ditë më vonë luan ndaj Zvicrës ndeshjen e fundit të fazës parakualifikuese të zonës së Evropës për në Mundobasket 2027.