Sarin: Shumë gjuajtje të humbura!

Trajneri i dytë i Vëllaznimit këtë stinor, Jeronimo Sarin, pasi që pësoi humbjen e parë tij në Superligë në ndeshjen e dytë të drejtuar nga ai, ka thënë se ekipi i tij nuk shfrytëzoi shutin për të shënuar, por as gjuajtjet e lira. Kjo në fund ndikoi në rezultat!

“Nëse ka diçka për të cilën duhet të jemi të kënaqur në këtë ndeshje, është çereku i fundit kur u kthyem prej minus 20 pikëve disavantazh në lojë. Mendoj që sot përkundër energjisë së dhënë, kemi humbur shumë gjuajtje, si ato për tre pikë, ashtu edhe ato të gjuajtjeve të lira. Basketbolli është lojë e thjeshtë, nëse nuk i shfrytëzon mundësitë për të shënuar, të shënojnë dhe fitojnë. Ata në anën tjetër kanë Dardan Berishën në ekip, që është më i miri në Kosovë, ndoshta në histori të Kosovës nuk e di, por ai bëri pikët në momentet më të rëndësishme të lojës,” ka thënë kroati Jeronimo Sarin për mikrofonin e transmetuesit të ndeshjes pas humbjes.

Vëllaznimi nisi stinorin me Branimir Pavicin kroat, për ta zëvendësuar atë me Jeronimo Sarinin, gjithashtu kroat. Kuqezinjtë e nisën me Sarinin me një fitore të madhe në Prishtinë ndaj rekord-kampiones, por në përballjen e dytë s’arritën t’i bëjnë ballë Pejës.