Beciragic: Mbrojtja e fortë, na mbajti lartë

Trajneri i Trepçës, Adis Beciragic, në deklaratën e dhënë pas fitores ndaj Bashkimit të shtunën pasdite, ka thënë se mbrojtja e mirë e ekipit të tij ka qenë arsyeja kryesore e fitores.

Beciragic me Trepçën ia shkaktuan humbjen e parë të stinorit Bashkimit si dhe iu revanshuan për humbjen në ciklin e parë të ndeshjeve të Superligës, kurse fitorja e thellë e shënuar me prizrenasit të ndalur në 52 pikë, ishte meritë e mbrojtjes sipas tij.

“Kemi bërë mbrojtje të mirë. Shumë të mirë. Edhe pse në sulm disa lojtarë nuk treguan veten, mbrojtja na mbajti lartë përgjatë ndeshjes dhe e arritëm fitoren e thellë,” ka thënë Beciragic pas fitores.

Trepça, që është kampione aktuale e Superligës, është ndjekësja e parë e Bashkimit në renditje tabelare dhe tashmë mitrovicasit iu afruan prizrenasve në një fitore/humbje në klasifikim.