Kandemir rikthehet në Superligën turke

Trajneri që kaloi pjesën vjeshtore të kampionatit në Superligë të Kosovës, Ahmet Kandemir, pritet t’i kthehet Superligës turke të basketbollit.

Yesilgiresun është ekipi i ri i Ahmet Kandemirit, ka bërë të ditur eurobasket.com ndërsa të njejtën e kanë shkruar edhe mediat turke, edhepse ekipi nuk e ka zyrtarizuar ende 47 vjeçarin si trajner.

Kandemir, në fillim të këtij stinori i ishte rikthyer Sigal Prishtinës, në rrugëtimin debutues të kampionit kosovar në Ligën e Kampionëve të basketbollit.

Edhepse Sigal Prishtina u eliminua në raundin e parë kualifikues të Ligës së Kampionëve të basketbollit, Kandemir ka arritur që të shënojë rekord fitore me bardhekaltërit në FIBA Europe Cup, ku ekipi nga kryeqyteti për një fitore nuk arriti kualifikimin, duke përfunduar i treti në grup, me bilanc 3-3.

Yesilgiresun dje ka bërë të ditur zyrtarisht se ka shkëputur marrëdhënien me trajnerin e deritashëm të ekipit, serbin 46 vjeç, Mihailo Uvalin.