Peja njofton për ndarje me Cowartin!

Dje, media të ndryshme online që shkruajnë për basketboll raportuan se basketbollisti i Pejës, Darnell Cowart ka arritur marrëveshje me ekipin izraelit të Winner League Elitzur Yavne.

Alo-qendra 203 centimetra e gjatë që së fundi ishte te Peja, u bë e ditur se ka nënshkruar deri në fund të stinorit me ekipin izraelit. Ndërkaq sot, Peja bëri të ditur se ka ndarë rrugët me atë për shkak të disa mosmarrëveshjeve, siç ka shkruar klubi verdhezi në njoftim.

“KB Peja njofton që basketbollisti Darnell Coëart Jr. nuk do të jetë më pjesë e skuadrës tonë për pjesën e mbetur të sezonit.
Cowart ishte pjesë e skuadrës nga muaji shtator, por pas disa mosmarrëveshjeve - kemi vendosur që të mos vazhdojmë aventurën e përbashkët.” - theksoi KB Peja.

Përndryshe Cowart ka qenë lojtari më i dalluar i Pejës në këtë stinor, ku luajti me mesatare prej 17 pikësh, 1 asistim dhe 8 kërcime për ndeshje, duke regjistruar edhe 1.5 top të rrëmbyer për lojë.

Në ditët në vijim mbetet të shihet se me kë do ta zëvendësojë Peja të larguarin Cowart, ndërsa aktualisht në Superligë kanë bilanc 4-5. Verdhezinjtë pas ndarjes me Rami Hadarin, po drejtohen prej irlandezit Daniel Nelson.