Tregimi i Domit në NHL

Kur menaxheri gjeneral i ekipit largon njërën nga shtyllat kryesore, kapitenin shumë-vjeçar për një lojtar nën-mesatar dhe një tjetër talent i cili ende nuk ka pasur kohë të rregullt në NHL, sigurisht që shfaqen kundërshtimet. Sidomos pasi ka larguar njërin nga mbrojtësit më të mirë, dhe hapin tjetër e ka të largojë të përzgjedhurin e tretë në draftin e vitit 2012.

Alex Galchenyuk kishte shënuar 108 gola, dhe me 147 asistime në gjashtë sezone për Montreal Canadiens, kishte arritur në 255 pikë në total. Ai ndërrohej me Max Domin i cili në tri sezone të zhvilluara në ligën profesioniste kishte 36 gola e 99 asistime. Revolta kundër Marc Bergevin ishte e dukshme.

Max Domi kishte lindur në vitin 1995, kur i ati i tij po kalonte një sezon ndryshimesh. Ai do linte Winnipeg Jets, për të kaluar tek Toronto Mapple Leafs. Me 3515 minuta dënimesh (çdo dënim nis nga dy minuta për ndërhyrje të rrezikshme) është lojtari i tretë më i dënuar në histori të ligës NHL. Ky ishte Tahir Domi, i njohur si Tie Domi, i lindur në vitin 1969 në Windsor të Ontarios.

Jeta e Tie Domit ka qenë e mbushur me ngjarje të ndryshme, ndonëse njihet më së shumti për rrahjet e tija në akullin e fushës së hokejit mbi akull. Ndër emrat e tij ‘përkëdhelës’ është ‘The Albanian Assassin’ (Vrasësi shqiptar). Ndërkohë, gjatë verës së vitit 1995 ka luajtur edhe futboll për skuadrën e Kosovës në Ligën Ndërkombëtare Kanadeze.

Është pensionuar në vitin 2006, në moshën 37 vjeçare, pasi kishte refuzuar të luante për ndonjë ekip tjetër pas 11 viteve të kaluara në Toronto Maple Leafs. E Toronto rivalitetin më të madh në ligë e ka kundër Montreal Canadiens. Në këtë skuadër nga kjo vjeshtë luan Max Domi i cili po kalon sezonin më të mirë të karrierës. Me 13 gola e 17 asistime, Max Domi renditet në pozitën e 22të në mesin e lojtarëve më efikas në NHL. Galchenyuk i cili ishte këmbyer për Domin, ka vetëm 3 gola e 7 asistime për Arizona Coyotes.

Me Domin (kampion bote në vitin 2016), Montreal Canadiens mund të ëndërrojnë për titullin e parë pas 26 viteve në NHL, ndonëse nuk kanë arritur në finale të NHL-së që nga sezoni 1992-93. Janë një ekip në ndërtim, me së paku 8 ekipe favorite para tyre, por sezoni i kaluar i Vegas Golden Knight lejon të gjithë të ëndërrojnë tash.