Urata e Qëndrimi

Çereku i kosovarëve sot do të kryej misionin e tyre në Olimpiadë. Urata Rama do të hap garat me mbi 50 konkurrente në disciplinën 10m pushkë ajrore. Vetëm tetë shkojnë në finalen e pasdites, kualifikimet nisin në ora 13:30, me kinezet si favoritë.

Një orë më vonë garat nis edhe Qëndrim Guri në garën rrugore të çiklizmit. Edhe ai ka një konkurrencë prej më shumë se 140 vetave nga ku më i miri pritet të dalë Chris Froome, pa harruar Cancellaran, Rodriguezin, Saganin, Uranin, e Nibalin. Gara e çiklizmit pritet të mbaroj dikur pas orës 18.

Finalja në shigjetim ekipor, qitje 10m me pistoletë ajrore për meshkuj, dhe skermë me disciplinën ‘Epee’ janë në program sonte, derisa peshëngritja me disciplinën e parë nis në mesnatë. Edhe në xhudo janë dy finale në ora 22:20, por pa garueset tona.

Ajo çfarë përshkruan javën e parë janë finalet e notit që nisin në ora 3 pas mesnate. Disciplinat 400m me stil të përzier për të dy gjinitë, 400m lirë për meshkujt, dhe 4x100m lirë për femrat gjejnë fituesit sot.

Ndërkohë në sportet ekipore veçohet përballja ndërmjet Serbisë dhe Hungarisë në vaterpolo (14:00) dhe SHBA-së me Kroacinë menjëherë më pas (15:30). Basketbollistet e Turqisë presin Francën në derbin evropian në ora 17:00, derisa në futboll të femrave Francën e pret SHBA-ja në ora 22:00. Kina është ndër të paktat që do të mund të sfidonte SHBA-në në basketboll të meshkujve në ndeshjen që nis në mesnatë. Suedia e Kosovare Asllanit ndeshet me Brazilin në futboll të femrave në ora 3, derisa Serbia dhe Italia mbyllin derbin evropian në volejboll të meshkujve. Kualifikimet në gjimnastikë janë pasdite -15:30, ndërsa ato në not në ora 18:00.

E kur jemi te ceremonia e hapjes, ishte disa shkallë më poshtë se Londra për mendimin tim. Interesante ishte tema natyrore e Olimpiadës, përfshirë edhe flakën deri diku minimale si hap në mbrojtje të ambientit. Por, si për ironi fishekzjarrët nuk ishin aspak të reduktuar.

Parakalimi i Kosovës do të mbetet diçka e jashtëzakonshme, ani pse renditja alfabetore e shteteve ishte tejet konfuze. Tash është koha për spektakël sportiv.