27 minuta për Maxhunin, Long Beach State mposhtet me ‘buzzer beater’

Në një nga ndeshjet më atraktive të sezonit në ligat e kolegjeve amerikane, skuadra e Long Beach State është mposhtur nga skuadra e UC Davis.

Ndeshja zgjati plot 3 orë e 15 minuta, me skuadrat që përveç kohës së rregullt prej 40 minutave, shkuan edhe 2 herë në vazhdime, ndërsa fituesi u përcaktua me ‘buzzer beater’ në sekondën e fundit të ndeshjes.

Skuadra ku aktivizohet Edon Maxhuni ishte në epërsi 2 pikëshe 8 sekonda pa përfunduar ndeshja, mirëpo në akcionin vendimtar, skuadra e UC Davis shënoi nga një tentim për 3 pikë në sekondën e fundit të ndeshjes, për ta mbyllur kështu duelin me fitore 105-104.

Si zakonisht, Edoni ishte startues edhe në këtë përballje, ndërsa luajti për gjithsej 27 minuta, brenda të cilave realizoi 9 pikë, 5 kërcime, 5 asistime dhe 3 topa të vjedhur, për të vazhduar kështu paraqitjet shumë të mira në vitin e tij të parë në kolegjet amerikane.

Përkundër humbjes, Long Beach State mbetet në garë për ta mbyllur sezonin me unazë në ‘Big West Conference’, si dhe gjasat për arritjen e një prej 6 vendeve të para, vende që dërgojnë në turneun e madh NCAA, mbesin gjithashtu reale.

Ndeshjen e ardhshme skuadra e fundorit kosovar me nënshtetësi finlandeze e luan të dielën në mëngjes ndaj skuadrës Cal Poly.