GoldenEagle Ylli ndahet me trajnerin Gezer

Trajneri turk i GoldenEagle Yllit, Fatih Emre Gezer, prej tash edhe zyrtarisht është ndarë me ekipin suharekas, ka bërë të ditur klubi verdhevjollcë në një njoftim botuar disa minuta më parë.

GoldenEagle Ylli që po synon titullin kampion këtë stinor, aktualisht është në pozitë të dytë të renditjes tabelare, ndërsa në xhiron e fundit mposhti Sigal Prishtinën në 13 qershori.

Mirëpo, rezultatet e javëve të kaluara dhe rreziku që të bien nga pozita e dytë (që siguron gjysmëfinalen e PlayOffit) tri xhiro para fundit të sezonit të rregullt — ka bërë që suharekasit me marrëveshje të ndajnë rrugët me turkun.

TABELA AKTUALE

“Me marrëveshje të dy-anshme kemi shkëputur marrëveshjen me trajnerin Fatih Gezer. GoldenEagle Ylli falenderon tranjerin dhe i uron sukses në të ardhmen atij,” ka bërë të ditur klubi në postimin e botuar në Facebook, duke bërë të ditur se nesër do të prezantojnë trajnerin e ri. 

GoldenEagle Ylli nisi stinorin me trajnerin Dragan Radovic, ndërsa e vazhdoi atë me Fatih Gezerin. Tash, shpejt pritet të emërojnë edhe trajnerin e tretë të stinorit, që pritet t’i udhëheq ata deri në fund të stinorit.

Në 3 xhirot e fundit GoldenEagle Ylli do të përballet me: Vëllaznimin (jashtë), Pejën (brenda) dhe Rahovecin (brenda).